LIFE IN PUROK SA PUROK 2, 3, 4, 6 UG 10, BARANGAY DUJALI
July 16, 2026 (Huwebes) | Padayon nga gipalapdan sa Lokal nga Panggamhanan sa Braulio E. Dujali ang paghatod sa mga nagkalain-laing serbisyo ngadto sa mga komunidad pinaagi sa LIFE in PUROK (Legislative Innovative Forum Endeavor – Panggamhanan Ug Residente Para sa Organisadong Komunidad), nga gipahigayon alang sa mga residente sa Purok 2, 3, 4, 6, ug 10 sa Barangay Dujali.
Personal nga gipangulohan ni Mayor Margarita Y. Rubinos ang kalihokan uban ni Vice Mayor Atty. Yasmin Valle-Campion, REA, REB, mga Miyembro sa Sangguniang Bayan, ug mga representante gikan sa Municipal Legislative Office, Municipal Health Office, ug Municipal Agriculture Office.
Atol sa programa, diin nakabenipisyo ang mga residente sa nagkadaiyang serbisyo sa gobyerno, lakip ang libreng medical services, pag-apod-apod sa vegetable seeds aron masuportahan ang backyard gardening ug panginabuhian sa mga pamilya, ug anti-rabies vaccination alang sa mga binuhi nga mga hayop, alang sa pagpatuman ug pagpalig-on sa anti rabies campaign sa atung local sa panggamhanan.
Pinaagi sa LIFE in PUROK, nagpadayon ang administrasyon ni Mayor Margarita Y. Rubinos sa pagdala sa serbisyo publiko ngadto mismo sa mga barangay, isip kabahin sa tumong nga mahimong mas duol, mas episyente, ug mas inklusibo ang pag-alagad sa matag Dujalinio.