EFS FARMER FIELD SCHOOL SA VEGETABLE PRODUCTION, GILUNSAD SA BRGY. MAGUPISING
July 20, 2026 (Lunes) | Pormal nga gilunsad ang EFS Farmer Field School on Vegetable Production ubos sa Agricultural Training Institute (ATI) sa Purok Anahaw, Brgy. Magupising, Braulio E. Dujali, isip kabahin sa padayon nga paningkamot sa pagpalambo sa kahibalo ug kapasidad sa mga mag-uuma sa produksyon sa mga utanon.
Gitambongan ang kalihokan sa mga miyembro sa Magaligayon Growers Association, Municipal Agriculture Office personnel, mga representante sa Agricultural Training Institute (ATI), ug mga opisyal sa barangay nga nagpakita sa ilang suporta sa pagpalig-on sa sektor sa agrikultura.
Naghatag usab og suporta ug mensahe si Mayor Margarita Y. Rubinos, uban nila Mr. Ben Cachuela, ATI Staff; Ms. Paulin Joy Gallardo, Development Management I; Hon. Oscar M. Alibio, Punong Barangay sa Magupising; ug Hon. Elvis T. Padilla.
Tumong sa maong Farmer Field School ang paghatag sa mga mag-uuma og praktikal nga kahibalo ug teknolohiya sa husto ug episyenteng pagpananom sa mga utanon pinaagi sa aktuwal nga pagkat-on sa umahan. Gilauman nga pinaagi niini, mas motaas ang kalidad sa produksyon, madugangan ang kita sa mga mag-uuma, ug mas mapalig-on ang seguridad sa pagkaon sa komunidad.
Ang maong inisyatibo nagpakita sa lig-on nga panagtinabangay sa LGU Braulio E. Dujali, ATI, ug sa mga lokal nga mag-uuma aron mapadayon ang usa ka produktibo, malungtaron, ug lig-on nga sektor sa agrikultura.