PANAGHIUSA UG PAGPALAMBO SA AGRIKULTURA, GIPALIG-ON SA MAFC 2026
July 20, 2026 (Lunes) | Nagkahiusa ang mga mag-uuma sa Municipality of Braulio E. Dujali atol sa Municipal Agriculture and Fishery Council (MAFC) Agri-Stakeholder Meeting ug Consultative Bodies’ Election 2026 nga gipahigayon sa Agro-Tourism Center, Brgy. Cabayangan.
Tumong sa maong kalihokan ang pagpaminaw sa mga kabalaka ug mga sugyot sa sektor sa agrikultura, pagpalig-on sa panaghiusa sa mga mag-uuma ug sa lokal nga panggamhanan, ug pagpili sa mga representante nga mahimong kabahin sa consultative bodies sa MFAC.
Gitambongan kini ni Mayor Margarita Y. Rubinos, uban nila Mr. Roy Jose D. Pascua, RAFC XI Coordinator; Ms. Girlie C. Gulanes, PCAF Region-Based Coordinator; Mr. Joaquin J. Partido Jr., MAFC Chairman; Ms. Mary Grace Gallana, RAgr., OIC Municipal Agriculturist; ug Ms. Amie Jane M. Fallera, RAgr., MAFC Coordinator ug Municipal Agriculture Personnel.
Sa iyang mensahe, gipasalamatan ni Mayor Rubinos ang padayon nga suporta ug aktibong partisipasyon sa mga mag-uuma. Gipasiugda usab niya nga ang lig-on nga panagtinabangay tali sa lokal nga panggamhanan ug sa sektor sa agrikultura maoy yawe aron mas mapalambo ang panginabuhian sa mga mag-uuma ug mapadayon ang kalamboan sa agrikultura sa Braulio E. Dujali.
Ang maong kalihokan nahimong higayon dili lamang sa pagpili og mga lider, apan usab sa pagtinabangay sa paghimo og mga plano ug desisyon nga makatubag sa tinuod nga panginahanglan sa mga mag-uuma sa lungsod.