MALIGAYON GROWERS VEGETABLE ASSOCIATION, NAKADAWAT OG MGA KAGAMITAN UG MATERYALES ALANG SA GULAYAN SA BAYAN
Malampusong nakadawat ang Maligayon Growers Vegetable Association og mga kagamitan ug materyales ubos sa Gulayan sa Bayan Program sa Department of Agriculture (DA), isip kabahin sa padayon nga suporta sa pagpalig-on sa produksyon sa utanon ug pagpausbaw sa kapasidad sa mga organisadong mag-uuma sa Munisipyo sa Braulio E. Dujali.
Lakip sa mga gihatag mao ang tulo (3) ka shovel, usa (1) ka wheelbarrow, duha (2) ka ream sa PE bags, tulo (3) ka drums, walo (8 ) ka pakete sa OP lettuce seeds, usa (1) ka rolyo sa plastic mulch, usa (1) ka drip irrigation kit, kalim-an (50) ka seedling trays, usa (1) ka rolyo sa fine mesh net, upat (4) ka grass hook, usa (1) ka knapsack sprayer, ug usa (1) ka rolyo sa black nursery net, nga gamiton sa pagpalambo sa Gulayan sa Bayan ug sa pagdugang sa produktibidad sa asosasyon.
Ang maong kalampusan nahimong posible pinaagi sa padayon nga suporta sa Municipal Mayor Hon. Margarita Y. Rubinos, Vice Mayor Atty. Yasmin Valle-Campion, ug sa mga Miyembro sa Sangguniang Bayan, uban sa pakigtambayayong sa Department of Agriculture ug sa Lokal nga Panggamhanan sa Braulio E. Dujali. Kini nagpamatuod sa ilang hiniusang paningkamot sa pagpalig-on sa sektor sa agrikultura, pagpalambo sa panginabuhian sa mga mag-uuma, ug pagsiguro sa malungtarong produksyon sa pagkaon sa munisipyo.