MOA SIGNING | LGU BRAULIO E. DUJALI UG LOCAL SUPPLIER ALANG SA DISASTER RESPONSE
Gipahigayon sa Lokal nga Panggamhanan sa Munisipyo sa Braulio E. Dujali ang pagpirma sa Memorandum of Agreement (MOA) uban sa local supplier alang sa procurement sa mga food ug non-food items nga gamiton panahon sa mga kalamidad ug uban pang mga sitwasyong nagkinahanglan og dinaliang pagresponde. Ang maong kasabutan nagtukod og mekanismo aron masiguro ang hapsay, tukmang panahon, ug episyenteng pag-angkon sa mga gikinahanglang suplay alang sa paghatag og tabang sa mga apektadong residente.
Subay kini sa mga balaod ug polisiya sa Disaster Risk Reduction and Management (DRRM). Pinaagi sa maong panagtambayayong, gipadayag sa Lokal nga Panggamhanan sa Braulio E. Dujali ang lig-on nga paningkamot niini sa pagpanalipod sa kinabuhi ug kabtangan sa katawhan pinaagi sa epektibong pagpatuman sa mga programa ug inisyatibo sa pagdumala sa kalamidad, ubos sa liderato ni Mayor Margarita Y. Rubinos, uban ni Vice Mayor Atty. Yasmin Valle-Campion ug sa mga Miyembro sa Sangguniang Bayan.